आजचा दिवस ऑर्थरायटीसचा सपोर्टग्रुप

२६ - ९ - १५
आजच्या दिवसाची सुरुवातच छान झाली.सुमनताई जोग यांचा सकाळीच फोन आला.खणखणीत आवाज,विचाराची स्पष्टता,रोकठोक बोलण,बोलण्याला कृतीशीलतेची जोड.ही त्यांची वैशिष्ट्य.शासकीय अभियांत्रिकी महविद्यालयात प्राध्यापकी केलेले अरुण जोग आणि सुमनताई, अरुण जोग याना झालेल्या पार्किन्सन्समुळे आमच्या परिवारात सामील झाले.दोघही सभा,सहली यात उत्साहाने सहभागी व्हायचे.अरुण जोग यांच्या ऐवजी वॉकर घेऊन येणार्या सुमन ताईच पेशंट वाटायच्या.त्याना अनेक आजार आहेत त्यांची वेगवेगळी  ऑप्रशनसही झालेली आहेत.आता तर बर्‍याचवेळा त्यांचा एक पाय घरात आणि एक पाय हॉस्पिटलमध्ये अशी परिस्थिती असते.पण खणखणीत आवाज,आणि काहीतरी करत राहण्याची जिद्द हा स्थायीभाव.
ऋषीकेशच्या  नृत्योपाचारासाठी  सुमन जोग यानी आपली जागा देऊ केली.एक एप्रील २०११ पासुन आठवड्यातून तिन दिवस सकाळी त्यांच्याकडे नृत्यवर्ग चालतो .अरुण जोग स्वतः शुभार्थी असल्याने प्रयोगात सामील ही झाले.मध्यंतरी त्यांचे दु:खद निधन झाले सुमन जोग काही दिवसासाठी अमेरीकेला गेल्या पण नृत्यवर्गासाठी जोगांचे घर खुलेच आहे.आमच्या कार्यकारिणीच्या मिटिंगसाठीही त्यांचे घर केंव्हाही खुले असते.त्यांच्या हॉलमध्ये इतरही उपक्रम चालू असतात.
आज त्यांचा फोन आला होता तो,त्या ऑर्थरायटीसचा सपोर्टग्रुप काढताहेत हे सांगण्यासाठी.याची पहिली सभा ११ ऑक्टोबरला भारतीनिवास हॉलमध्ये होणार आहे.याबद्दलची माहिती मंडळाच्या सभेत द्यावी अशी त्यांची इछ्या होती.याची बरेच दिवस आधी पूर्व तयारी चालू होती.घरातून कोणाच्या मदतीशिवाय बाहेर जाऊ शकत नाही,जिला घरातही मदतनिसाची गरज आहे अशी पंचाहत्तरी ओलांडलेली बाई सपोर्ट ग्रुप चालू करायचा विचार करु शकते.मी आवक झाले होते.सुमनताई सलाम तुमच्यातल्या उर्जेला.